Böyükağa Hacıyev mətbuat konfransında nə dedi? 

00:52 23-11-2012
Böyükağa Hacıyev mətbuat konfransında nə dedi? 
SM: Avroliqanın H qrupunun V turu çərçivəsində “Neftçi” – “Partizan” matçından (1:1) sonra mətbuat konfransı keçirilib. Sportmedia.az xəbər verir ki, Belqrad təmsilçisinin baş məşqçisi Vladimir Vermezoviçin ardından media önünə “Neftçi” klubunun çalışdırıcısı Böyükağa Hacıyev keçib. 

- “Rubin”lə qarşılaşmadan sonra Cavidin olmamağından təəssüfləndiniz. İmamverdiyev meydanda olsaydı da, ümidləri doğrultmadı. Bundan başqa, Mahir Şükürov və Erik Ramos meydana çıxsaydı, necə ola bilərdi?
- Cavid bu gün pis təsir bağışlamadı. Nəzərə alaq ki, uzun müddət zədədən əziyyət çəkirdi. “Sumqayıt”la görüşdə cəmi 55 dəqiqə oynamışdı. Araz Abdullayevi meydana atmaqla, Cavidi çıxardım. Emin Mehtiyev heç də Mahirdən pis oynamadı. Tərlan ilk dəfə dayaq yarımmüdafiəçisi kimi çıxış etdi. Vurmayana vurarlar. Çalışacağıq ki, səhvlərdən nəticə çıxaraq. İndi diqqətimizi daxili çempionata yönəldirik. Çünki Premyer Liqada qalib olmaqla, gələn il daha güclü və təcrübəli “Neftçi” ilə avrokuboklarda mübarizə aparmaq istəyirik.

- Bu oyunadək rəqibdən asılı olmayaraq, optimist danışırdınız. Artıq nikbinliyiniz görünmür. Sanki “İnter”lə matça məğlub gedirik. Bu, nədən irəli gəlir?
- Bir şeyi unutmayın ki, həmişə nikbinəm. Mən bu gün bu səviyyədə qalibəm. Hansı komanda ilk ilində avrokuboklara düşüb, 2 xal yığıb? “Neftçi” avrokubokda səs salırsa, məğlubiyyətdən söhbət gedə bilməz. Fakt odur ki, “Neftçi” tarix yazdı. Təəssüf ki, qələbə qazana bilmədik. Sadəcə, yorğunam. İstəyirsinizsə, şaqqanaq çəkim. Ona görə optimist görünməyə bilərəm. 

- Sizə elə gəlmirmi ki, “Neftçi” milli komandanın nəticəsini təkrarladı?
- Futbolda öz dəst-xəttim var. Amma millinin oyununu təkrarlamaram. Necə müdafiədən oynayaram ki, Emin Mehtiyev hücuma gedirdi. Heç vaxt “Neftçi” müdafiədən futbol oynamayıb. Belə olsaydı, Avropadan xallarla qayıdardıq. Bir komandada 2 müdafiəçi daim irəli gedirsə, hansı müdafiə futbolundan söhbət gedə bilər?

- Vobay heç nə ilə yadda qalmadı. Onu niyə dəyişmədiniz?
- Vobayn yerinə kimi meydana ata bilərəm ki? Daim hücum edirsə, onu niyə çıxarmalıyam? Yaddan çıxarmayın ki, 2 gün sonra “Bakı”ya, daha sonra “Tərəqqi”yə qarşı oynayacağıq. Dünənə kimi Vobay yaxşı idisə, indi pis oldu? Kim futbolu mənimlə müzakirə etmək istəyirsə, buyurun bazaya. Kimsə, mənə məsləhət verməsin.

- Bahodir Nasimovun adı “18-lik”də var idi. Onu oynatsaydınız, 2 hücumçu olan sistemlə çıxış edərdinizmi?
- Bahodir çox istedadlıdır. Məşqlərə başlasa da, hələ pik nöqtədə deyil. Adının “18-liy”ə salınması psixoloji cəhətdən onu hazırlaşdırmaq idi. Əgər ehtiyatda hücumçumuz çox olsaydı, 2 yox, 3 hücumçu ilə də oynamağa hazıram. Elvin Yunusazdə, Emin Mehdiyev, Cavid İmamverdiyev, Rəşad Sadiqovun orta yaş həddinə baxın. Onlara təşəkkür edirəm. Avroliqada belə oynayırlarsa, deməli, millidə də yaxşı çıxış edəcəklər.

- Ən zəif oyunçu komandada kimi gördünüz?
- Bizdə ən zəif bənd Böyükağa Hacıyevdir. Mən heç kimə zəif deyə bilmərəm. Bu gün “Rubin” “İnter”i 3:0 hesabı ilə udur. Halbuki, mənə “niyə “Rubin”i uda bilmədik” deyə ittihamlar irəli sürürlər...

.
.
.
0.64386296272278